Ֆրանսիայում Հայաստանի դեսպան Հասմիկ Տոլմաջյանի հանդիպումը Լը Ռենսիի քաղաքապետ Ժան-Միշել Ժենըստիեի հետ

26 հունիսի, 2022

Ս.թ. հունիսի 26-ին Ֆրանսիայում Հայաստանի դեսպան Հասմիկ Տոլմաջյանը հանդիպում ունեցավ Լը Ռենսիի քաղաքապետ Ժան-Միշել Ժենըստիեի (M. Jean-Michel Genestier) հետ։

ՀՀ դեսպանը կարևորեց Լը Ռենսիում շուրջ 100 տարի գործող և Ֆրանսիայում ամենահին հայկական կրթահամալիրը հանդիսացող «Դպրոցասեր»-ի դերն ինչպես հայապահպանման, այնպես էլ ֆրանսիական հանրակրթական չափորոշիչներին համահունչ որակյալ կրթություն ընձեռելու գործում։

Միաժամանակ դեսպան Տոլմաջյանն ընդգծեց «Դպրոցասեր»-ի՝ Հայոց ցեղասպանության վերապրումի ու հայապահպանության ուրույն խորհրդանիշ լինելու փաստը, որն իր պատմությամբ վկայում է նաև հայ-ֆրանսիական բարեկամության մասին։ Հիշատակեց, որ հիմնադրված լինելով Կոնստանտինապոլսում 1879թ., «Դպրոցասեր»-ի՝ Հայոց ցեղասպանությունից փրկված ուսուցիչներն ու աշակերտները ֆրանսիական իշխանությունների հոգածությամբ են տեղափոխվել Ֆրանսիա, որոնց օգնությամբ հայկական կրթարանը, մանկավարժներն ու սաները ֆրանսիական հյուրընկալ հողի վրա նոր կյանքի հնարավորություն են ստացել և վերելք ապրել, ինչի շնորհիվ ցայսօր «Դպրոցասեր»-ը շարունակում է հարատևել կրթական իր լավագույն ավանդույթները։

Զրուցակիցները համոզմունք հայտնեցին, որ «Դպրոցասեր»-ը Լը Ռենսի քաղաքի պատմության և պատմամշակութային ժառանգության անբաժանելի մասն է, և որ ֆրանսահայերն իրենց արժեքավոր նպաստն ունեն քաղաքի զարգացման գործում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր